Ein gwaith ni yn gymunedau

Rydyn ni’n gweithio gyda chymunedau ar draws y rhanbarth i wella gofod sy’n cael ei rannu ar gyfer bywyd gwyllt a dod â phobl yn nes at natur. Rydyn ni’n ymdrechu i gysylltu pobl â gofod naturiol a chefnogi cymunedau i greu llefydd gwyllt diogel, cynhwysol yn agos at ble mae pobl yn byw, yn gweithio ac yn chwarae.

Mae llawer o bobl yn methu â chael mynediad i lefydd gwyllt yn agos at eu cartrefi. Yn rhy aml, mae hyn yn gysylltiedig â phroblemau sylfaenol mewn cymdeithas, fel gwahaniaethu, braint neu ormes. Rydyn ni’n gweithio i ddeall yn well y rhwystrau sy’n bodoli rhwng unigolion, cymunedau a’r byd naturiol; gan geisio grymuso pobl o bob hunaniaeth, diwylliant, cefndir a gallu i werthfawrogi, mwynhau, codi llais a gweithredu dros fywyd gwyllt.

Ein huchelgais ni yw gweithio gan ddefnyddio 'egwyddorion trefnu cymunedol'. Mae hyn yn golygu ein bod ni’n gwrando, yn ysbrydoli, yn cymell ac yn galluogi pobl i adeiladu eu pŵer ar y cyd i weithredu dros fyd natur yn y llefydd ble maent yn byw. Fe wnaethon ni dreialu’r dull hwn i ddechrau fel rhan o ‘Natur Drws Nesaf’; prosiect dwy flynedd a gyllidwyd gan Gronfa Dreftadaeth y Loteri Genedlaethol, a oedd yn galluogi pob Ymddiriedolaeth Natur yn y DU i weithio gyda chymunedau penodol i helpu i ddiogelu a hyrwyddo byd natur a bywyd gwyllt. Gallwch ddarganfod mwy am y prosiect arloesol hwn a’r effaith mae’n parhau i’w chael yma.

Ein dyhead ni yw esblygu fel sefydliad drwy ddysgu oddi wrth ein cymunedau ni. Byddwn yn parhau i wella’r ffordd rydyn ni’n diwallu eu hanghenion ac yn eu cefnogi gyda’r hyn sy’n bwysig iddyn nhw, fel ein bod ni i gyd yn gallu teimlo’n fwy abl i ddiogelu’r llefydd rydym ni’n byw ynddyn nhw.

Mae’r Ymddiriedolaethau Natur yn fudiad cenedlaethol sy’n ceisio ysbrydoli gweithredu dros fyd natur mewn cymunedau ledled y DU. Yn fuan iawn byddwn yn cynnwys dolen ar y dudalen hon i Hwb Cymunedol amlgyfrwng newydd sbon, lle byddwch chi’n dod o hyd i adnoddau i gynnig ysbrydoliaeth, syniadau a chyngor ar gyfer trefnu eich prosiect cymunedol eich hun, o arian a chyllid i weithio gyda phobl a dechrau eich grŵp eich hun. Byddwn hefyd yn defnyddio'r gofod yma ar ein gwefan ni i rannu straeon cymunedol, fel eich bod yn gallu clywed yn uniongyrchol gan y bobl ledled Gogledd Cymru sy'n gweithio i gefnogi bywyd gwyllt.