Bydd ymwelwyr rheolaidd â Gwarchodfa Natur Big Pool Wood wedi sylwi bod y llwybr troed o amgylch ochr bellaf y pwll wedi mynd yn llawer mwy mwdlyd. Mae wedi bod yn amhosibl cerdded arno yn aml yn ystod y gaeaf heb welingtyns – a fawr ddim gwell yn ystod yr haf! Doedden ni ddim yn siŵr pam oedd hyn yn digwydd, neu hyd yn oed ai ni oedd ar fai ein hunain – gallai unrhyw beth o newid yn yr hinsawdd i gynyddu nifer yr ymwelwyr neu glirio helyg ymledol allan o’r pwll fod wedi cyfrannu. Beth bynnag oedd y rheswm, daeth yn amlwg y byddai’n rhaid gwneud rhywbeth, yn enwedig gan ei fod wedi bod yn uchelgais hirdymor gan yr Ymddiriedolaeth Natur i wneud y ddolen gyfan o amgylch y pwll yn hygyrch i ddefnyddwyr cadeiriau olwyn a sgwteri symudedd.

Nawr, diolch i gyllid o Gronfa Gymunedol Gwynt y Môr a Chronfa Cymuned Ymestynnol Banc Burbo, rydyn ni’n cymryd cam enfawr ymlaen. Yn ystod yr wythnosau a’r misoedd nesaf, byddwn yn cwblhau darn 70m o lwybr pren newydd sbon (ar ben pyst wedi’u gwneud yn lleol o blastig wedi’i ailgylchu) ac yn uwchraddio 350m arall o’r llwybr gydag arwynebau cadarn a llefydd pasio; yn ogystal â gosod ramp i un o’r cuddfannau a llwyfan archwilio pwll – am welliant! Bydd llawer o’r gwaith adeiladu wedi’i gwblhau cyn diwedd mis Mawrth, gyda’r holl waith sy’n tarfu wedi’i drefnu cyn dechrau tymor nythu’r adar!

Gwirfoddolwyr gwerthfawr

Er bod yr arian ar gyfer y gwaith yma wedi dod gan gyllidwyr allanol – ac rydyn ni’n ddiolchgar iawn iddynt! – mae’r gwaith ar y tir yn cael ei wneud yn bennaf gan ein grŵp anhygoel ni o wirfoddolwyr. Mae dwy brif fantais i’r ymdrech anhygoel yma (anhygoel yn benodol am ei fod yn golygu gweithio mewn mwd a dŵr sy’n sefyll!) – mae’n arbed arian, wrth gwrs, y gellir ei ailfuddsoddi mewn gwaith arall er lles bywyd gwyllt, ond mae gan yr amser sy’n cael ei gyfrannu werth ariannol mewn ffordd arall hefyd, gan helpu i ddangos ein hymrwymiad ni i’r cyrff cyllido. Rydyn ni, wrth gwrs, yn sicrhau ein bod yn dilyn yr holl ganllawiau cyfredol ynghylch gweithio yn ystod y pandemig – cyfyngu ar nifer y cyfranogwyr a sicrhau bod yr holl fesurau cadw pellter cymdeithasol a hylendid yn cael eu rhoi ar waith. Mae natur linellol y dasg yn helpu hefyd!

Os yw’r cyfyngiadau teithio’n caniatáu, byddem wrth ein bodd yn eich gweld yn ymweld â Big Pool Wood. www.northwaleswildlifetrust.org.uk/cy/nature-reserves/big-pool-wood