Helpwch ni i warchod un o raeadrau mwyaf eiconig Eryri

Mae cais cynllunio wedi cael ei gyflwyno i godi argae ar Afon Cynfal ger Llan Ffestiniog, fel rhan o gynllun trydan dŵr. Bydd yr argae hwn yn dargyfeirio hyd at 70% o’r dŵr o Raeadr y Cwm, y rhaeadr eiconig yng Nghwm Cynfal, ac mae’r newid mewn hydroleg a fyddai’n digwydd yn fygythiad difrifol i’r mwsoglau a’r cwpanllysiau prin sy’n nodweddion yn Safle o Ddiddordeb Gwyddonol Arbennig Afon Cynfal. Fel rhan o gynllun tebyg ar Afon Cwm Llechen, dim ond 21 milltir i ffwrdd, gwelwyd dirywiad o hyd at 43% mewn pedair o bob pum rhywogaeth dros gyfnod o ddeng mlynedd. 

Er bod Ymddiriedolaeth Natur Gogledd Cymru yn cefnogi ynni gwyrdd yn gyffredinol, mae’r risgiau y mae’r cynllun hwn yn eu creu i fywyd gwyllt yn anghymesur â’r swm bach o drydan y byddai’n ei gynhyrchu – dim ond 600kW, digon ar gyfer dim ond 60 cawod pŵer trydan! 

Dywed Adrian Lloyd Jones, Pennaeth Tirweddau Byw gydag Ymddiriedolaeth Natur Gogledd Cymru: “O ystyried y swm bach o bŵer y byddai’r cynllyn pŵer trydan dŵr (HEP) arfaethedig yma’n ei gynhyrchu, a’r dirywiad mewn cymunedau o fryoffytau, gan gynnwys cornllysiau, cwpanllysiau a mwsoglau, a welwyd yn dilyn cynllyn HEP tebyg mewn mannau eraill yng Ngogledd Cymru, mae'r cynllun yma’n peri llawer gormod o risg i fywyd gwyllt Cwm Cynfal. Er ein bod ni’n cefnogi ynni gwyrdd, rhaid i bob datblygiad fod yn y lle iawn, ac mae’r cynnig yma, yn amlwg, yn y lle anghywir.” 

Codi ein llais yn erbyn y cynllun

Fe allwch chi helpu i warchod y bywyd gwyllt yng Nghwm Cynfal 

Mae Achub Ein Hafonydd, Cymdeithas Eryri, Buglife ac Ymddiriedolaeth Natur Gogledd Cymru wedi dod at ei gilydd i atal y datblygiad hwn rhag niweidio bywyd gwyllt gwerthfawr Cwm Cynfal. Rydyn ni'n annog pawb sy'n hoff o fyd natur i'n helpu ni! 

Anfonwch lythyr i Barc Cenedlaethol Eryri cyn 20fed Medi yn gwrthwynebu’r cynnig datblygu hwn. Gallwch ddefnyddio’r ddolen e-weithredu isod i anfon llythyr parod o wrthwynebiad i’r awdurdod cynllunio. Os ydych chi’n dymuno, fe allwch chi hefyd olygu'r llythyr i adlewyrchu eich barn chi eich hun cyn i chi ei gyflwyno. 

Ysgrifennu llythyr fel bod eich llais yn cael ei glywed

Gwylio lluniau drôn o Gwm Cynfal yma