Gweithio gyda'r prif gontractwr penodedig W.F. Clayton Ltd a thrigolion Toronnen, mae Ymddiriedolaeth Natur Gogledd Cymru wedi darparu bocsys nythu arbennig ar gyfer gwenoliaid duon, sydd wedi'u gosod yn yr inswleiddiad allanol ar y tai.

Dywedodd Sara Williams, Rheolwr Prosiect yn Adra: “Rydym yn hynod falch o gael y cyfle i gydweithio ag Ymddiriedolaeth Natur Gogledd Cymru ac o ganlyniad gallu helpu’r gwenoliaid du i oroesi a ffynnu yn ardal Bangor lle rydym yn gwella ansawdd ac edrychiad ein cartrefi.”

Ben Stammers, North Wales Wildlife Trust's swift action project officer says: “Mae’r bocsys  yn ail-greu’r math o lleoedd caeedig mae gwenoliaid duon eisoes yn nythu ynddynt, a’r gobaith yw y bydd yn creu cyfleoedd i boblogaeth wenoliaid Toronnen ehangu.

“Gwennoliaid duon yw'r adar cyflymaf wrth hedfan, ac maent yn treulio bron eu holl oes ar yr adain. Maent yn teithio yn ôl o Affrica bob blwyddyn i nythu, ond yn anffodus, mae gwenoliaid duon bellach yn un o’r rhywogaethau adar sydd wedi prinhau fwyaf yng Nghymru (72% i lawr ers 1995), ac yn diflannu o lawer o drefi a phentrefi. Ym Mangor, dim ond llond llaw o safleoedd lle maent yn dal i nythu, a'u cadarnle olaf yw ardal Toronnen/Coed Mawr.

“Rydw i wedi cael fy nghalonogi gan ymateb y trigolion, mae’n ymddangos bod pobl wir yn gwerthfawrogi’r adar hynod gyflym hyn, ac eisiau eu helpu trwy gael bocsys nythu. Gyda’r opsiynau nythu ychwanegol hyn, gadewch i ni obeithio y bydd mwy o wenoliaid duon yn gallu bywiogi’r awyr uwchben Toronnen yn y dyfodol.”

Mae rhagor o wybodaeth am brosiect cadwraeth Ymddiriedolaeth Natur Gogledd Cymru ar gael yn: Adfer y gwenoliaid duon.