Tirwedd Fyw Stad Ddiwydiannol Wrecsam - Darganfod

Ar un o stadau diwydiannol mwyaf Ewrop mae amrywiaeth ryfeddol o fywyd gwyllt yn byw sydd angen ein help ni. Mae ein gwaith yn dod â phobl, bywyd gwyllt a busnesau at ei gilydd mewn ffordd newydd. Rydyn ni’n gwella cynefinoedd ac yn gwneud yr ardal yn fwy atyniadol i weithio ynddi. Mae hyn nid yn unig yn helpu pobl i fwynhau gweithio yma ond mae hefyd yn denu mwy o fusnesau i’r ardal. Trwy wneud hyn, rydyn ni’n helpu i achub rhai o’r rhywogaethau mwyaf carismataidd sydd i’w cael yng Nghymru. Sgroliwch i lawr am wybodaeth am beth i’w weld, ble i archwilio a sut i gymryd rhan.    

Cysylltu â ni

Mae ein gwaith ar y stad ddiwydiannol yn dod â phobl a bywyd gwyllt at ei gilydd. Rydyn ni nid yn unig yn helpu ardaloedd naturiol ac anifeiliaid ond hefyd yn cael busnesau i gefnogi, a chael gweithwyr allan o’u swyddfeydd yn ystod amser cinio, ac annog y gymuned ehangach i ymweld.

Mae’r cyflawniadau’n cynnwys agor gwarchodfeydd natur cyhoeddus, gosod ardaloedd picnic yn eu lle, plannu perllannau, codi arwyddion, lleihau sbwriel, cerfluniau trawiadol, ymylon lliwgar o flodau gwyllt a chylchfannau, gwella mynediad a llwybrau a hefyd annog pobl o amgylch y stad. Isod mae lluniau o rai o’r cyflawniadau yn ystod y prosiect 'Bioamrywiaeth yn creu Busnes'.

Yn groes i’r gred boblogaidd, mae safleoedd tir llwyd yn gartref i gasgliad rhyfeddol o fywyd. Gallant fod yn ail yn unig i goetir hynafol am eu bioamrywiaeth. Mae’r cynefinoedd noeth lle arferai warysau sefyll ar un adeg, gyda lleiniau gwyrdd o’u hamgylch, yn creu cartrefi i nifer o rywogaethau prin, yn enwedig infertebrata. Isod mae detholiad o rai o’r prif rywogaethau rydyn ni’n gweithio i’w helpu ar y stad.

Rydyn ni’n rheoli dwy ardal ar y stad ddiwydiannol sy’n cynnig mynediad i’r cyhoedd ar gyfer archwilio. Y rhain yw Erlas Black Wood a Gwarchodfa Natur Hoya. Hefyd, rydyn ni’n agor y llwybrau troed ac yn dynodi mwy ohonyn nhw fel bod gweithwyr, pobl leol ac ymwelwyr yn gallu archwilio, darganfod ac ymarfer. Isod mae map sy’n dangos ble mae cael hyd i’r gwarchodfeydd a’r teithiau cerdded a argymhellir. Cliciwch ar yr eiconau a’r llinellau am fwy o wybodaeth.

Eiconau mochyn daear = llefydd i ymweld â nhw

Llinellau oren = y llwybrau caniataol a argymhellir a’r hawliau tramwy

Byddem wrth ein bodd pe baech chi’n ymuno â’r prosiect, boed yn lleol, yn ymweld neu’n gweithio ar y stad. Fel rhan o hyn, byddwch yn dysgu sgiliau newydd, yn cyfarfod pobl wych ac yn cael awyr iach a chyfle i ymarfer mewn ffordd adeiladol. Mae rhai o’r tasgau rydyn ni’n ymgymryd â nhw’n cynnwys gosod bocsys adar ac ystlumod yn eu lle, adfer pyllau, codi arwyddion, arolygu rhywogaethau, plannu gwrychoedd a choed a llawer mwy! Mae pethau newydd i roi cynnig arnyn nhw bob amser, felly cofiwch gadw mewn cysylltiad.