Am dan y warchodfa

Ein mawndiroedd gwerthfawr

Ar yr olwg gyntaf, gall y warchodfa yma edrych fel cymysgedd o wyrdd a brown heb lawer yn digwydd ynddi. Ond dim ond ychydig o archwilio sydd ei angen i ddarganfod bod corsydd mawn ymhlith cynefinoedd mwyaf amrywiol y wlad. Mae mawndiroedd yn cynnig manteision i bobl hefyd: mae mawndiroedd y DU yn storio tua 4,500 miliwn o dunelli o garbon atmosfferig (mae hynny 100 gwaith yn fwy na holl lystyfiant y DU, gan gynnwys coed) ac mae 70% o’n dŵr yfed yn dod o ddalgylchoedd afon mawndir. Yn anffodus, mae’r cynefin hwn o dan fygythiad – arferai fod yn gyffredin ledled y DU ond ychydig o gorsydd mawn sydd ar ôl erbyn heddiw, ar ôl iddynt gael eu draenio ar gyfer tir amaethyddol a fforestydd.

             
Ceir chwe amrywiaeth o fwsogl sffagnwm ym Mlaen-y-Weirglodd, a hefyd amrywiaeth enfawr o blanhigion arbenigol fel llafn y bladur, chwys yr haul, ffa’r gors a phlu’r gweunydd. Ochr yn ochr â’r holl blanhigion amrywiol yma ceir amrywiaeth enfawr o infertebrata, gyda mwy na 230 o rywogaethau wedi’u cofnodi ar y safle. Yn eu tro, mae’r rhain yn denu adar fel y tingoch, y pengoch a’r llinos.

Cyfarwyddiadau

Mae’r warchodfa 2 filltir i’r de orllewin o Lansannan. Wrth deithio o’r cyfeiriad yma, gadewch y B5382 a dilyn y B5384 i gyfeiriad Gwytherin. Cymerwch yr ail dro i’r chwith, mynd dros grid gwartheg ac wedyn edrych am gilfan fechan ar y dde (SH 911 634: os byddwch yn cyrraedd y grid gwartheg nesaf, byddwch wedi mynd yn rhy bell). Parciwch yma, croesi’r ffordd a cherdded i fyny dros y cae ar y chwith, gan fynd drwy giât mochyn a dilyn yr hen glawdd ar y chwith i chi er mwyn cyrraedd y warchodfa.